Гэта незалежны беларускі даследчы ўніверсітэт, які ствараюць інтэлектуалы і навукоўцы ў выгнанні. Ён будзе арыентаваны на акадэмічныя свабоды, сучасныя еўрапейскія стандарты і беларускую праблематыку, прапаноўваючы магістарскія і дактаранцкія праграмы.

Будучы ўніверсітэт атрымае выразны даследчы профіль: акцэнт будзе зроблены не толькі на перадачы ведаў, але і на іх стварэнні. Плануецца навучанне магістрантаў і дактарантаў у цеснай сувязі з даследаваннямі аб Беларусі, для Беларусі і беларусаў, на беларускай мове, найперш сацыяльна-гуманітарнымі і міждысцыплінарнымі.

Універсітэт ініцыявалі беларускія навукоўцы і выкладчыкі ў выгнанні. Яны аб’ядналіся, каб адказаць на выклікі часу і стварыць сучасную акадэмічную інстытуцыю, якая развівае беларускую навуку, рыхтуе новае пакаленне даследчыкаў і ўносіць беларускую перспектыву ў глабальную інтэлектуальную прастору.

Астафей Валовіч быў дзяржаўным дзеячом ВКЛ XVI стагоддзя, які выступаў за падтрымку адукацыі, асветы, кнігадрукавання і быў сярод тых, чыя ініцыятыва прывяла да заснавання Віленскага ўніверсітэта. Яго імя сімвалізуе спалучэнне нацыянальнай адказнасці, еўрапейскага мыслення і культурнай адкрытасці, што закладзена ў місіі новага ўніверсітэта.

Праграмы будуць адкрыты для беларусаў і беларусак з розных краін, а таксама для ўсіх, каму цікавыя беларуская мова, культура і даследаванні пра Беларусь у еўрапейскім кантэксце. Далучацца змогуць студэнты і даследчыкі з любым грамадзянствам, калі яны падзяляюць каштоўнасці і акадэмічныя прынцыпы ўніверсітэта.

Аргкамітэт рыхтуе рэгістрацыю ўніверсітэта ў Польшчы. Універсітэт будзе дзейнічаць у Еўропе ў гібрыдным фармаце – анлайн і афлайн, а дакладныя месцы афлайн-актыўнасцей будуць абвешчаныя пазней.